Бөгөн кооперацияларға берләшеүҙе тормош үҙе талап итә. Баҙар иҡтисады йәшәйешебеҙгә көндән-көн нығыраҡ үтеп инә бара. Хужалыҡтар ҙа, ауыл халҡы ла ауыл хужалығы продукцияһы етештереү буйынса һөҙөмтәле эшләй. Әммә уны эшкәртеп, тейешле хаҡҡа һата белмәйбеҙ. Әле конкурентлыҡ шарттарында быны яңғыҙың ғына атҡарып сығыу мөмкин түгел. Шуға ла ауыл хужалығы кооперацияларына берләшеү берҙән-бер юл булып тора.

Кооперацияларға дөйөм хужалыҡтар ғына түгел, фермерҙар, шәхси хужалыҡтар ҙа ҡушыла ала. Алға киткән сит илдәрҙә бер фермер бер нисә кооперацияла ағза булып торорға мөмкин. Шөкөр, Башҡортостанда ла кооперациялар күренә башланы, сөнки республика етәкселеге был тәңгәлдә әүҙем, ойошҡан эшмәкәрлек алып бара.
Күгәрсен районында ла бөгөн был юҫыҡта маҡсатлы эш ҡуйылып, ыңғай миҫалдар бар. Әйтеп үтеүебеҙсә, әле фермерҙар һәм шәхси ярҙамсы хужалыҡ етәкселәре үҙ продукцияһын һатыуҙа ҙур ҡыйынлыҡ кисерә. 1995 йылдың 8 декабрендәге “Ауыл хужалығы кооперацияһы тураһында”ғы 193-сө Федераль законға ярашлы, төбәктә урындағы халыҡ етештергән тауарҙарҙы һатыу буйынса тырышлыҡты берләштереү маҡсатында “Тәүәкән-ит” ауыл хужалығы ҡулланыусылар кооперативы ойошторолған. “Октябрь” ауыл хужалығы етештереү кооперативы, “Искәндәр”, “Күгәрсен” агрофирмаһы, “Н.И. Криваткиндың крәҫтиән (фермер) хужалығы”, “Ҡалдар”, “Утар”, “Иртөбәк агрофирмаһы” яуаплылығы сикләнгән йәмғиәттәре, шәхси эшҡыуарҙар Юнир Искәндәров, Игорь Казарин, Альберт Ҡаҙбәков кооперативтың нигеҙен тәшкил итә. “Иртөбәк” агрофирмаһы директоры Александр Николаев ойошманың рәйесе, “Октябрь” кооперативы рәйесе Андрей Зиновьев иһә секретарь итеп һайланған.
Яңы кооперативтың маҡсаты — ауыл хужалығы етештереүен үҫтереү, продукция һатыуға булышлыҡ итеү, социаль ихтыяжды ҡәнәғәтләндереү, хеҙмәт етештереүсәнлеген арттырыу, мәшғүллекте тәьмин итеү, килем алыу. Яҡынса иҫәп-хисаптар күрһәтеүенсә, продукцияны кооператив аша һатыу табышты күбәйтеү, сығымды иһә 20-25 процентҡа кәметеү мөмкинлеген бирәсәк.
Прогресс утарындағы мал һуйыу цехы ла бөгөн кооператив составында. 2016 йылда асылған цех көнөнә 15-20 баш һыйыр малын, 100-200 ҡаҙ һуйыу һәм сифатлы ит етештереү мөмкинлеген бирә. Әле һуйыу цехы хеҙмәттәре менән район хужалыҡтары, ауыл халҡы файҙалана, бынан тыш күрше райондарҙан да киләләр. Хеҙмәт күрһәтеү түләүле, хаҡтары ныҡ тешләшмәй. Цех сит илдә етештерелгән заманса ҡорамалдар менән йыһазланды­рылған, хеҙмәткәрҙәр өсөн айырым бүлмәләр ҙә ҡаралған, муллаға ла махсус бүлмә булдырылған. Әле цехта бөтәһе биш кеше эш менән мәшғүл, әлбиттә, ҡыҙыу осорҙа уларҙың һаны артып китә.
Бында субпродукттарҙан мал аҙығы етештереү цехы уңышлы эшләй.
Етәкселектең киләсәккә уй-хыялдары ла бар — колбаса етештереү цехы булдырып, халыҡты сифатлы һәм иң мөһиме – хәләл ризыҡ менән тәьмин итеү.
— Халыҡ эшебеҙҙән ҡәнәғәт, бер-беребеҙҙе аңлап эш итәбеҙ. Клиенттарҙың һорауы буйынса малдарҙы үҙебеҙ ҙә барып алабыҙ, — ти мал һуйыу цехы мөдире Айнур Әбделмәнов.