Рәсәй агросәнәғәтенең почетлы, Башҡортостандың атҡаҙанған ауыл хужалығы хеҙмәткәре Ғәлим Булат улы Сәлимовтың уңған һәм оҫта етәкселегендә Ленин исемендәге хужалыҡ — көньяҡ-көнсығыш төбәктә генә түгел, республика кимәлендә лә һөҙөмтәле эшләгән предприятиеларҙың береһе. Оҙаҡ йылдар коллектив ошо дәрәжәгә тап төшөрмәй, ауыл хужалығы производствоһын ойоштороуҙа берәүгә лә алдынғылыҡты бирмәй, үҫемлекселек һәм малсылыҡ тармаҡтарын үҫтереү буйынса юғары күрһәткестәргә өлгәшә. Әлеге миҙгелде лә “лениндар” юғары әҙерлек менән ҡаршылап, дәррәү темпта алып бара, башҡаларға үрнәк булып тора.

Хужалыҡҡа 2496 гектарҙа яҙғы сәсеүҙе атҡарыу бурысы тора, шуның 1850-һен иген культуралары тәшкил итә. Атап әйткәндә, 650 гектарҙа арпа, 500 гектарҙа бойҙай, 700 гектарҙа һоло, 350 гектарҙа рапс, 200 гектарҙа судан үләне, шулай уҡ рапс менән судан үләне ҡатнашмаһы, донник сәселәсәк. Страховка культураһы булараҡ, был юлы ла хужалыҡ ужым арышынан баш тартманы – ул былтыр көҙ 150 гектарҙа сәсеп ҡалдырылған һәм, белгес­тәр белдереүенсә, яҡшы ҡыш­лаған.
Әйтергә кәрәк, яҙғы баҫыу эштәренә әҙерлекте хужалыҡ үткән көҙ үк башлап, сәскестәр, ауыл хужалығы машиналары үҙ ваҡытында ремонтланған. 600 гектарҙа ер туңға һөрөлгән, тағы ла 400 гектарҙа эшкәртелгән. Орлоҡ фонды мәлендә әҙерләп һалынған, ул яңы сорттар менән тулыланған. Хужалыҡтың инженерия, агрономия хеҙмәттәре, бригадалар урындарҙағы эште оҫта ойошторған. Быларҙың барыһы ла яңы миҙгелде яҡшы әҙерлек һәм көр кәйеф менән башларға мөмкинлек биргән.
Яҙғы баҫыу эштәренә К-700 һәм Т-150К тракторҙары менән өс берәмек ҡамыл сәскестәре йәлеп ителгән. Тәжрибәле меха­низаторҙар, Башҡортостандың атҡаҙанған ауыл хужалығы хеҙмәткәрҙәре Айрат Бүкәнбаев менән Наил Солтанов, Айрат Туйсин агрегаттары һоло сәсеүҙе тамамлап, әле төп көстө төп аҙыҡ-түлек культураһы — бойҙайға йүнәлткән. Орлоҡ ташыуҙа механизаторҙар Самат Сәйетов, Салауат һәм Ҡәнзәфәр Гөлбәйетовтар, водитель Дамир Үҙәнбаев, сәсеүселәр Илгиз Әсмәндиәров, Мөҙәрис Хәсәнов, Рәмил Солтанов, Алмас Сәйетов, Илдар Гөлбәйетов, Илнар Туйсиндар маҡтауға лайыҡ. Урал аръяғы агросәнәғәт колледжы студенттарының да ярҙамы ҙур. Әйткәндәй, ошо арала мал аҙығы һәм техник культуралар сәсеүгә рәт сәскестәре йәлеп ителәсәк.
Йәмил Үҙәнбаев етәкселе­гендәге ырҙын табағы коллективы ла үҙ иңенә йөкмәтелгән бурысты намыҫ менән атҡара, ашхана кол­лективы иһә баҫыу батыр­ҙарын тәмле аш-һыуы менән һөйөндөрә.
Яҙғы баҫыу эштәренең ойош­ҡан барыуында ошо осорға иғлан ителгән хеҙмәт ярышы ла ҙур әһәмиәткә эйә. Уның шарттарына ярашлы, әле хужалыҡта удар бер, өс, биш көнлөктәр ойошторола, уларҙа еңеүселәргә аҡса­лата премиялар бирелә. Сәсеү йомғаҡтары буйынса иң яҡшы звенолар, механизаторҙар билдәләнәсәк.
Бер үк ваҡытта хужалыҡтың башҡа өлкәләрендә лә эш гөрләй, малсылыҡта иһә йәйләүҙәргә күсереү эштәре тамамланды. Бөгөн “лениндар” йәйге осорҙо мөм­кин тиклем тулыраҡ файҙа­ланыу өсөн маҡсатлы йүнәлеш алған. Бынан тыш, фермаларҙы ҡышҡылыҡҡа ремонтлау кеүек эш тә башҡарыла.
Төбәк агросәнәғәтенең лайыҡ­лы лидеры — Ленин исемендәге хужалыҡ, һәр ваҡыттағыса, яңы миҙгелде алдынғы технологиялар нигеҙендә, ойошҡан рәүештә, сифатлы итеп алып бара, башҡаларға өлгө булып тора.

Баймаҡ районы.