Ағы барҙың туғы бар, ти, беҙҙең халыҡ. Ысынлап та, көндәлек тормошобоҙҙо һөт аҙыҡтарынан тыш бер нисек тә күҙ алдына килтереп булмай. Һыйырың булғанда табының да һыйлы, тырышҡан саҡта ауыл ерендә өҫтәлең һөт-ҡаймаҡтан, ҡатыҡ, ҡороттан, эремсектән өҙөлмәй. Район үҙәктәре һәм ҡалала йәшәүселәр өсөн был аҙыҡ-түлек һөт заводтарында етештерелә, халыҡ иһә уларҙың тәмле-сифатлыһын ҡарап, кибеттәрҙән һатып ала. Ә иң тәмле һәм сифатлы һөт ризыҡтары ҡайҙа тиһегеҙме? Бик булмаһа, Тәтешле май заводы етештергән ашамлыҡтарҙан ауыҙ итеп ҡарағыҙ. “Әлбиттә, уларҙың иң тәмлеһе беҙҙә”, – ти тәтешлеләр. Ярты быуатлыҡ эш тәжрибәһе булған һәм уңышлы ғына эшләп килгән ошо ойошма хаҡында бөгөн һүҙебеҙ.

Тәтешле һөт заводы, Яңауыл май-сыр комбинатының филиалы була­раҡ, 1960 йылдарҙа уҡ барлыҡҡа килә. Предприятиела сыр, ярымфабрикаттар, ҡаймаҡ, аҡ май етештерелә. Һөт заводында Түбәнге Балтас, Аҡбулат, Күрҙем, Аҡсәйет, Бәҙрәш сепарат пункттары эшләй.
Бөгөнгө көндә Тәтешле май заводы – райондың муниципаль милеккә идара итеү комитеты ҡарамағында. 2003 йылдан заводтың етештереү бинаһы­ның майҙаны 400 квадрат метрға ҙурайтыла. Ике йыл эсендә реконструкция эштәре алып барыла, етеш­тереү бинаһына капиталь ремонт яһа­ла, компрессор цехы һәм һөт ризыҡ­тарын ҡаптарға тултырыу һәм пастеризациялау йүнәлештәре яңынан төҙөлә. Был иһә предприя­тиеға өр-яңы мөмкинлектәр – төрлө һөт ризыҡтарын етештереү эшмә­кәрлегенә юл аса.
2009 йылда аҙыҡ-түлек етештереү эшмәкәрлеге тағы ла киңәйтелә. Бының өсөн алты миллион һум самаһы күләмдә яңы ҡорамал­дар, әҙер продукцияны ташыу өсөн махсус машиналар һатып алына. Бөгөн Тәтешле май заводының һөттө эшкәртеү ҡеүәте – тәүлегенә һигеҙ тонна.
Етештерелгән аҙыҡ-түлек төрлө төбәктәргә оҙатыла. Өфө ҡалаһында предприятиеның әҙер продукцияны һаҡлау һәм тапшырыу өсөн махсус базаһы бар, сауҙа нөктәләренә оҙатыу өсөн махсус бүлек тә булдырылған.
Тәтешле май заводында етеш­терелгән һөт ризыҡтарына халыҡтың ихтыяжы ҙур. Тауар ваҡытында тейешле урындарға оҙатыла. Һөттө ҡабул итеү ҙә яйға һалынған. Ҡабул итеү пункты Күрҙем ауылында урынлашҡан, унда һөт махсус һыуытыла һәм баш ҡалаға ебәрелә. 2016 йылда ауыл хужалығы кооперативтарынан 273 180 мең һумға иҫәпләнгән – 15 937 тонна, шулай уҡ 8799 мең һумға 687 тонна һөт ҡабул ителгән һәм 1138, 2 тонна һөт ризыҡтары етештерелгән.
– Төп йүнәлешебеҙ – ҡаймаҡ, ҡатыҡ, эремсек, пастеризацияланған һөт етештереү. Яҡын арала аҙыҡ-түлек етештереү күләмен арттырырға ниәтләнәбеҙ, сөнки йыл һайын халыҡтан һөт ҡабул итеү күләме лә арта. Штатта 37 һөт йыйыусы, ете шәхси эшҡыуар иҫәпләнә. Һуңғы туғыҙ айҙа халыҡтан 1975 тонна һөт ҡабул ителгән. Икенсенән, был күрһәткестәр халыҡтың көнкүреш кимәлен яҡшыртыуға ла үҙ өлөшөн индерә. Шуға ла яҡын арала көнөнә 1-әр тонна ҡаймаҡ, ҡатыҡ, эремсек, 20 тонна пастеризацияланған һөт, 2 тон­на кефир етештереүҙе планлаш­тырабыҙ.
Бөгөнгө көндә беҙҙең заводта 43 хеҙмәткәр үҙ эшен оло яуаплылыҡ менән башҡара. Уларҙың уртаса айлыҡ эш хаҡы кәмендә 15 100 һум. Хеҙмәткәрҙәргә ваҡытында һәм даими түләнә. Эшселәр ҙә үҙ сиратында яуаплылар. Улар араһында бигерәк тә Зинира Асҡарова, Әлфит Шәмсет­динов, Вячеслав Муллаяров, Рәмис Хөснийәровтарҙы билдәләргә була. Ошондай хеҙмәткәрҙәр барында күрһәткестәребеҙ ҙә яҡшы буласаҡ, тип уйлайбыҙ, – тине Тәтешле май заводы директоры Ришат Усман улы Мансуров.
Сифатлы аҙыҡ-түлек етештереү – предприятиеның төп маҡсаты. Был йәһәттән Тәтешле май заводы ла алдынғылар рәтендә. Шуға ла һыйлы өҫтәлегеҙҙе улар етеш­тер­гән ризыҡ­тар менән һис икелән­мәйенсә тулыландыра алаһығыҙ.

Р. МӨҘӘРИСОВА.