“Раевка” яуаплылығы сикләнгән йәмғиәте төбәктә эре һәм алдынғы хужалыҡтарҙан һанала. Ауыл эшсәндәре, иген культуралары, шәкәр сөгөлдөрө үҫтереү менән бер рәттән, һөт, ит етештереү, тоҡомло мал аҫрау менән ныҡлап шөғөлләнә. Бынан бер нисә йыл элек ул “Колос Агро” яуаплылығы сикләнгән йәмғиәтен, “Агрофирма “Красный Клин” хужалыҡтарын да үҙенең ҡанатына һыйындырған. Был хужалыҡтарҙа, нигеҙҙә, иң ҙур шәкәр сөгөлдөрө плантациялары урынлашҡан.


Йәмғиәт аграрийҙары йылдағыса яҙғы сәсеү эштәрен ҡыҫҡа ваҡыт эсендә тәүгеләрҙән булып тамамлап, әле ишле малға етерлек күләмдә мал аҙығы хәстәрләү бурысы менән йәшәй. Бөгөнгә улар хужалыҡ ихатаһына 400 тоннанан ашыу бесән ташыған да инде. Ҡышҡылыҡҡа мал аҙығы әҙерләү бында ҡыҙыу һәм яҡшы ойошторолған.
Көҙ ауыл эшсәндәре дүрт меңдән ашыу гектарҙа шәкәр сөгөлдөрө, 4169 гектарҙа – бойҙай, арпа, кукуруз һәм башҡа культуралар йыйып аласаҡ. Хужалыҡтың 32 мең гектар ауыл хужалығы ерҙәре бар, шуның 25 мең гектарын һөрөнтө ерҙәр тәшкил итә. Баҫыуҙар тәрбиәле, ҡараулы, уларҙы минераль ашламалар менән туйындырғас, йыл да мул уңыш алыуға өлгәшәләр.
– Беҙҙә тырыш, эшһөйәр халыҡ хеҙмәт өлгөһө күрһәтә, йәштәрҙең булыуы ла һөйөндөрә, шөкөр, ололарға алмаш етерлек, – ти йәмғиәттең генераль директоры, Башҡортостандың атҡаҙанған ауыл хужалығы хеҙмәткәре Илнур Рифғәт улы Йосопов. – Юғары, махсус урта белемле белгестәр ҙә беҙгә ҙур теләк менән эшкә килә.
Техника паркы ла бында бай, 125 трактор иҫәпләнә, төрлө ҡеүәтле заманса комбайндар ҙа бар. Паркты йыл һайын яңы машиналар менән тулыландырып торалар. Ситтән техника йәлеп итмәйҙәр, бар баҫыу эштәрен үҙҙәренең көсө менән башҡаралар. Мәҫәлән, һуңғы бер нисә йылда ғына йәмғиәт етәкселеге 123 миллион һумлыҡ 26 берәмек техника һәм төрлө ҡорамал һатып алыуға өлгәшкән.
“Раевка” яуаплылығы сикләнгән йәмғиәте төбәктә һөт етештереү буйынса алдынғылар иҫәбендә килә. Бында ете һөтсөлөк фермаһы уңышлы эшләй, малсылар көн һайын 14 тонна сифатлы һөт һауып алып, Стәрле­тамаҡтың “Аллат”, Өфө һөт комбинаттарына оҙаталар. Һатыуҙан килгән табыш фермаларҙы ремонтлауға, тармаҡты яңыртыуға тотонола. Бөгөн һөтсөлөк фермалары заманса йыһазландырылған, ҡул көсө бөтөнләй тиерлек ҡулланылмай. Әле йәмғиәттең өс мең баш симменталь тоҡомло һыйыр малы йәйге лагерҙа тотола, шуның 1300-өн һауалар. Быйылдан башлап йәйге йәйләүҙә тәрбиәләнгән малдарҙы электр көтөүсе көтә. Бындай электр көтөүселәр әле төбәктә тәүгеһе. “Хеҙмәткәрҙәрҙең эш шарттарын яҡшыртыу өҫтөндә йыш эшләйбеҙ. Бының өсөн аҡса йәлләмәйбеҙ, сөнки уларҙың тырыш хеҙмәте һөҙөмтәһендә хужалыҡ йылдан-йыл яңы ҡаҙаныштарға өлгәшә лә инде”, – ти директорҙың етештереү буйынса урынбаҫары Руслан Мөхәмәтшин. Бөгөн бында 100-гә яҡын кеше эш менән мәшғүл.
Хужалыҡ етәкселеге көтөүҙе тоҡомло йәш таналар менән тулыландырыу эшен дә алып бара. Бында яһалма ҡасырыу яҡшы ҡуйылған. Тоҡомсолоҡ заводы булараҡ, йыл һайын уңайлы килешеүҙәр төҙөп, мал да һаталар.
Илнур Йосопов етәкселегендәге хужалыҡ базаһында йыш ҡына семинар-кәңәшмәләр үткәрелә, уларҙың тәжрибәһен өйрәнергә тип төрлө райондарҙан да киләләр.
Бынан тыш, йәмғиәт, Башҡортостан ауыл хужалығы институты ғалимдары менән яҡшы мөнәсәбәт булдырып, уларҙы йыл һайын баҫыуҙарға тәжрибә өйрәнеү өсөн саҡыра. Әйткәндәй, сөгөлдөрҙән йыл да мул уңыш алалар, уны Раевка шәкәр заводына оҙатып, һатыуҙан килгән табыш фәҡәт хужалыҡ кәрәк-ярағына, эш хаҡы түләүгә, техника һатып алыуға тотонола икән. Бынан тыш, яңы келәттәр, заманса биналар төҙөлә, һөтсөлөк фермалары төҙөкләндерелә. Көҙ йыйып алынған уңышты юғалтыуһыҙ һаҡлау өсөн ҡеүәтле иген һаҡлағыстар урынлаштырылған.
Ауыл хужалығы ойошмаһында тырыштар һәм хеҙмәттең тәмен, бәҫен белгәндәр генә тир түгә. Етәкселек яһалма ҡасырыу эшен алып барыусы белгестәр Илдар Әхмәҙиев, Валентина Бебякина, Сания Фәйзрахманова, механизатор Мөслим Бейбутов, водителдәр Дамир Мөсәүиров, Рафаэль Ғәйетов, Виктор Самораков, Геннадий Предатченконы маҡтап телгә алды.

Әлшәй районы.