Күптән түгел “HeadHunter” исемле эш эҙләү агентлығы Башҡортостан халҡы араһында ҡыҙыҡ ҡына һорау алыу үткәрҙе. “Үҙ ғаилә ағзаларығыҙ йәки туған-тыумасағыҙ менән бер ойошмала эшләүгә нисек ҡарайһығыҙ?” Ошо һорауға нисек яуап биргәндәр?
Баҡһаң, һорау алыуҙа ҡатнашыусыларҙың яртыһы үҙ туғандары менән бер компанияла эшләүҙән ҡасырға тырыша икән. Ә 12 проценты был хәлгә һис юл ҡуймау яҡлы, өстән бер өлөшө генә бергә эшләүҙең насар яғын күрмәй. Ҡаршы килеүселәр бигерәк тә хәүефһеҙлек хеҙмәтендә, ойошмаларҙың юридик бүлектәрендә һәм топ-менеджерҙар араһында күп.
Ни өсөн риза түгелдәр? Төп сәбәп итеп яуап биреүселәрҙең 60 проценты туғандары менән ыҙғышыу ихтималлығын күрһәтә, ә 53 проценты эш һөҙөмтәһенә кире йоғонто яһалыуҙан ҡурҡа, һәр өсөнсөһө хеҙмәттәштәре менән ара боҙолоу мөмкинлеген күрһәтә.
Ләкин һорау алыу барышында шул да асыҡланды: респонденттарҙың 45 процентына туған-тыумасаһы менән бер коллективта эшләргә тура килгән. Уларҙың 36 проценты – ата-әсәһе, 23 проценты – ире йәки ҡатыны, 22 проценты – ағаһы йәки апаһы, биш проценты – алыҫ ҡәрҙәше, ә өс проценты хатта олатаһы йәки өләсәһе менән бергә булған.
Ҡулайлы тип тапмаһалар ҙа, һорау алыуҙа ҡатнашыусы­ларҙың һәр өсөнсөһө яҡындарын үҙе эшләгән ойошмаға саҡырырға теләр ине. Тимәк, туғандарыңа эш табып бирергә ярҙам итеү теләге хәҙерге көрсөк заманында ҡайһы бер уңайһыҙлыҡтарҙан өҫтөнөрәк. Был айырыуса эшсе һөнәрҙәренә хас.