Йыл башынан республикала 307 юл һәләкәте теркәлгән, был уҙған йылға ҡарағанда 106-ға аҙыраҡ.
Аварияларҙа 394 кеше имгәнгән, былтырғы менән сағыштырғанда 142 кешегә аҙыраҡ. 45 кеше һәләк булған, үткән йылға ҡарағанда 3 кешегә кәмерәк. Был хаҡта 10 мартта хөкүмәттең оператив кәңәшмәһендә транспорт һәм юл хужалығы министры Любовь Минакова белдерҙе.
«Уҙған аҙнала теркәлгән юл фажиғәләрендә дүрт кешенең ғүмере өҙөлгән. Ә 306 водитель эсеп тотолған», — тине Любовь Минакова.
Башҡортостан Башлығы Радий Хәбиров кисә Ҡариҙел районында Бөрө – Таҙтүбә – Һатҡы юлының 72-се километрында биш кешенең ғүмерен ҡыйған ҡурҡыныс аварияның сәбәбен һораны. Министр һүҙҙәренсә, быға уҙып китергә теләү сәбәпсе.