Айыуҙы банка менән ҡурҡытмаҡсы булған

Бөрйән районында булған ҡот осҡос хәлдең сәбәптәре асыҡланды.

Һуңғы ваҡытта Башҡортостанда айыуҙарҙың кешегә һөжүм итеү осраҡтары йышайҙы. Тәүгеһе 21 мартта Баймаҡ районының 2-се Этҡол ауылынан 7 саҡрым алыҫлыҡта булғайны. Тайыштабан һөжүменән зыян күргән 62 йәшлек ир үҙ аяҡтарында район дауаханаһына килә. Уға операция яһайҙар, әлеге ваҡытта реанимацияла ята.

Бөгөн йыртҡысты атып алыуға өсөн рөхсәт бирелгән. Баймаҡта 10 һунарсынан торған төркөм эшләй, тип хәбәр иттеләр «Башинформ» агентлығына республика тәбиғәттән файҙаланыу һәм экология министрлығынан

Икенсе ҡот осҡос осраҡ Бөрйән районында теркәлде. 22 мартта айыу тырнағына эләккән 57 йәшлек ирҙе район дауаханаһына килтерәләр. Уға шулай уҡ операция яһайҙар, хәле тотороҡло ауыр тип баһалана. Яңы Усман ауылы уҙаманы йыртҡысҡа урманда ҡайын һуты йыйып йөрөгәндә тап булған.

— Ул айыуҙан ҡасырға маташҡан. 3 литрлыҡ банкаһы ярылып, тайыштабан тауыштан ҡурҡҡан, — тип һөйләне Байғаҙы ауылы хакимиәте хеҙмәткәрҙәре.

Бөгөн һунарсылар был тирәлә айыуҙы эҙләй. Йыртҡысҡа һунар итеүгә рөхсәт ҡағыҙы бирелгән. БР тәбиғәттән файҙаланыу һәм экология министры урынбаҫары Камил Берғулиев йыртҡыстарҙың ваҡытынан алда уяныуға бәйле, уларҙың агрессив булыуы хаҡында һөйләне.

«Яландарҙа, урмандарҙа ҡар ҡалманы. Кешеләр иркенләп урманға йөрөй башланы. Ҡайһы берҙәр мышы мөгөҙө эҙләй, кемдер ҡайын һуты йыя. Ике осраҡта ла ирҙәр урманға яңғыҙ барған һәм үҙҙәре лә белмәйенсә айыуҙар янына барып сыҡҡан. Йыртҡыстар уларҙың яҡынлашыуын ишетмәй һәм һөжүм итә. Хәҙер иң мөһиме – зыян күреүселәрҙең тиҙерәк һауығыуы», – тип белдерҙе Камил Бирғулиев.

Бөгөн БР һаулыҡ һаҡлау министры Айрат Рәхмәтуллин айыу һөжүменән зыян күргән ирҙәрҙең хәле тураһында хәбәр итте. Зыян күреүселәрҙең икеһе лә реанимацияла. Тәүге пациент – 62 йәшлек ир ауыр хәлдә. Бөрйән районында йәшәүсенең хәле уртаса. 

Быға тиклем Башҡортостандың тәбиғәттән файҙаланыу һәм экология министрлығында йыртҡыс менән осрашҡанда үҙеңде нисек тоторға кәрәклеге хаҡында һөйләгәйнеләр.