Баш ҡаланың Салауат Юлаев майҙанын биләп алған “һөт йылғалары”нан көнө буйы халыҡ өҙөлмәне. Ҡунаҡтарҙы “Һөт йәрминкәһе”, “Фермер баҙары”, “Сыр” лавкаһы”, “Һөт кафеһы”, милли кухня магниттай үҙенә тартты, ә балалар тере ферма эргәһенән оҙаҡ китә алмай йөҙәне.

…Кескәй Мәликәгә барыһы ла ҡыҙыҡ: бында уға тәмле һөт бик оҡшаған, баштары аллы-гөллө сәскәләр менән биҙәлгән ҡара-сыбар һыйырҙарҙың бер кемгә лә иғтибар итмәй сабыр ғына көйшәүҙәре, һарыҡтарҙың йылы “тундары” ғәжәпкә ҡалдырған. Фестиваль баш ҡалабыҙҙа һигеҙенсе тапҡыр үткәрелһә лә, Зариповтар ғаиләһенең был сараны тәүгә күреүе.

– Әлдә килгәнбеҙ, ниндәй күркәм байрамдан ҡоро ҡалыр инек, – ти улар. – Башҡортостанда етештерелгән күп төрлө һөт ризыҡтарын тәмләнек, хәҙер балалар өсөн ойошторолған уйын майҙандарын ҡарамаҡсыбыҙ.

“Һөт иле” – республикабыҙҙа ғына түгел, бөтә Рәсәйҙә иң ҙур ғаилә байрамы. Социаль әһәмиәтле был проект сәләмәт йәшәү рәүешен популярлаштырыу, үҙебеҙҙә етештерелгән сифатлы, файҙалы һөт аҙыҡтары менән таныштырыуҙы күҙ уңында тота. Уның рәсми партнерҙары – “Россельхозбанк” һәм “Вимм-Билль-Данн” компанияһы быйыл да өфөләргә иҫтә ҡалырлыҡ байрам бүләк итте.

Өфөләр үҙебеҙҙә етештерелгән төрлө-төрлө һөт ризыҡтарынан ауыҙ итте, яңы продукттарҙың сифатын баһаланы, арзан хаҡҡа үҙҙәренә оҡшағандарын һатып алды. Кемдер “Мин һөттө яратам” тип яҙылған гигант символ янында фотоға төшөп кинәнде, ә бесәнлектә шау-гөр килешеп аунашҡан бала-сағаның шатлыҡтан балҡыған йөҙҙәрен күрһәгеҙ икән! Малайҙарҙы, әлбиттә, йәрминкәнән бигерәк үҙ ҡулдары менән робот йыйыу ҡыҙыҡһындырҙы, ғәжәп ҙур динозаврҙар һындары кескәйҙәрҙең генә түгел, өлкәндәрҙең дә иғтибарын яуланы.

Былтыр үткән “Һөт иле”ндә өфөләр 10 мең тонна һөт эсеп, 45 мең тоннанан ашыу һөт ризыҡтарын һатып алһа, быйылғы һөҙөмтә лә шунан ҡайтыш булмаҫ, ти ойоштороусылар.

Фестивалдең төп үҙенсәлегенә килгәндә, ул “Сыр академияһы” семинарын, “Башҡортостандың иң яҡшы сыры” конкурсын, “Һөткә ғәҙел хаҡ – уңыш формулаһы” тип аталған эшлекле кәңәшмәне эсенә алған ҙур программа менән иҫтә ҡаласаҡ. Эшлекле осрашыуҙа көнүҙәк мәсьәләләр буйынса фекер алышыу менән бергә һөтсөлөк тармағын 2020 һәм 2030 йылдарға тиклем үҫтереү буйынса комплекслы программа ла ҡаралды. Сарала ҡатнашҡан Рәсәйҙең төп агросәнәғәт предприятиелары етәксе­ләре, ҡорамал менән тәьмин итеүсе­ләр һәм һөт аҙыҡтары етештереүселәр продукция сифатын яҡшыртыу, конкуренцияға һәләтлелеген һәм экспортҡа оҙатыу күләмен арттырыу хаҡында фекерҙәре менән уртаҡлашты.
Фестивалдәге эшлекле осрашыуҙар тармаҡтағы мөһим мәсьәләләргә асыҡлыҡ индерелеренә, уларҙы хәл итеүҙә алтын урталыҡ табылырына ышаныс уятты.