Ялғандың ямауы юҡ15.01.2019
Хәүефле “дарыу”ҙарға ҡаршы көрәш көсәйә.

Илдең Дәүләт Думаһы ялған дарыуҙар һәм биологик әүҙем өҫтәмәләр әйләнеше өсөн яуаплылыҡты арттырыу буйынса Рәсәйҙең Административ хоҡуҡ боҙоуҙар һәм Енәйәт кодекстарына үҙгәрештәрҙе беренсе уҡыуҙа бер тауыштан ҡабул итте.

Кешеләрҙең ғүмерен һәм һау­лығын хәстәрләүгә йүнәлтелгән был документ “Берҙәм Рәсәй” партия­һының өҫтөнлөклө проекты булып тора. Ул Рәсәй Дәүләт Дума­һы Рәйесе урынбаҫары Ирина Яровая, хәүефһеҙлек һәм коррупцияға ҡаршы көрәш комитеты рәйесе урынбаҫары Эрнест Вәлиев, ғаилә, ҡатын-ҡыҙҙар һәм балалар комитеты рәйесе урынбаҫары Ольга Окунева, финанс баҙары буйынса комитет рәйесе урынбаҫары Антон Гетта, депутат Александр Прокопьев тарафынан әҙерләнгән.

Ирина Яроваяның был йәһәттән фекере ҡәтғи:
– Ялған дарыуҙар етештереү, ғәмәлдә, ойошторолған енәйәтсел эшмәкәрлек булып тора. Ул ил иҡтисадына ғына зыян килтереп ҡалмай, кешеләрҙең ғүмеренә һәм һаулығына ҙур хәүеф менән янай. Ялған һәм контрафакт дарыу­ҙарҙы, медицина әйберҙәрен, биологик әүҙем өҫтәмәләрҙе һатыу һәм таратыу тейешле яуаплылыҡҡа тарттырыуҙы күҙалларға тейеш.

Рәсәй Дәүләт Думаһы Рәйесе урынбаҫары белдереүенсә, ике төрлө фальсификат бар: ябай итеп әйткәндә, составына бер ниндәй ҙә дауалау компоненты инмәгән “буш ҡыуыҡ­тар” һәм хәүефле матдәле “дарыуҙар”. Икеһен дә таратыу, һатыу аңлы рәүештә хоҡуҡ боҙоу тигәнде аңлата. Был – күмәк халыҡҡа ҡаршы йүнәлтелгән эшмәкәрлек һәм кешенең һау­лығына, ғүмеренә бәйле көтөлмәгән һөҙөм­тәләргә килтереүе ихтимал. Беренсенән, ваҡытында дөрөҫ дауалау алма­ған граж­дандың сәләмәтлеге ныҡ­лы ҡаҡшауы һәм башҡа эҙемтәләр булыуы ихтимал. Икен­се­нән, зарарлы матдәләр ҡулланып, һау­лыҡ­ҡа төҙәтеп булмаҫлыҡ ҙур зыян килтерергә мөмкин.

Ялған дарыуҙарҙы, медицина әйберҙәрен йәки биологик әүҙем матдәләрҙе интернет селтәре аша таратыу тағы ла ҡурҡынысыраҡ эҙемтәләргә килтереүе бар, сөнки таралыу сиге күпкә киңәйә, ил иҡтисадына зыян килтергән закон­һыҙ килем күләме лә арта. Шуға ла парламентарий был енәйәт өсөн йәмғиәткә килтерелгән зыянға ярашлы яуаплылыҡ кимәлен билдәләргә тәҡдим итә.

Билдәле булыуынса, 2014 йыл­дың декабрендә ялған дарыуҙар таратҡан өсөн яуаплылыҡ кимәле билдәләнгәйне. Законға ярашлы, 2017 йылда “Росздравнадзор” тарафынан алты сауҙа маркаһы, ялған дарыуҙарҙың алты серияһы; ялған фармацевтика субстанция­ларының ике сауҙа маркаһы һәм 215 серияһы; талаптарға ярашлы булмаған бер миллиондан ашыу медицина әйберҙәре әйләнештән алынған; 269 455 теркәлмәгән һәм 3875 ялған медицина әйбере асыҡланған.

Бигерәк тә ошондай ялған тауарҙар менән сауҙа итеү интернет селтәрендә киң таралған һәм донъяуи киңлекте үҙ эсенә ала, тип әйткәйнек инде. Хоҡуҡ һаҡлау органдары рецепт менән генә таратылырға тейешле дарыу­ҙар, ныҡ тәьҫир иткән, психотроп һәм наркотик матдәләр һатылған 700-гә яҡын сайтты асыҡлаған. Ошо йәһәттән Рәсәй граждан­да­рының хәүефһеҙлеген хәстәрләү өсөн закон сығарыусылар ҡануниәткә өҫтәмә квалификация билдәһе индермәксе. Был виртуаль селтәр аша ялған дарыуҙар, медицина әйберҙәре, биологик әүҙем матдәләр таратылған осраҡта, енәйәтселәрҙең биш йылдан һигеҙ йылғаса иркенән мәхрүм ителеүе ихтимал тигәнде аңлата. Айырым кешеләр өсөн административ яуаплылыҡ – 75-тән 200 мең һумғаса, вазифалы кешеләр өсөн – 150 мең һумдан 800 мең һумғаса, шәхси эшҡыуарҙар өсөн шулай уҡ 150 мең һумдан 800 мең һумғаса, ойошмалар өсөн ике – биш миллион һумғаса штрафҡа етеүе мөмкин. Шулай уҡ һуңғы ике субъект өсөн эшмәкәрлектәрен 90 көнгәсә туҡтатыу ҙа ҡаралған.

Ирина Яровая был башланғыс бер үк ваҡытта иҫкәртеү сараһы ла булып тора тип белдерә: яуап­лылыҡтың юғары кимәле билдә­ләнгән осраҡта, енәйәтсел эшмә­кәр­лектең әһәмиәте кәмей. Закон проекты шулай уҡ Европа Сове­тының Медицина тауарҙарын фаль­сификациялау һәм халыҡ сәләмәтлегенә зыян килтереүсе шуға оҡшаш енәйәттәр менән кө­рәшеү конвенцияһы талаптарын да үтәй (“Медикрим” Конвен­цияһы).
Башланғыс Рәсәй Хөкүмәте тарафынан хупланған.


Вернуться назад