Башҡортостан Мәғарифты үҫтереү институтында ғәҙәти булмаған шахмат турниры булды: һары сәсле гүзәл заттар ҡара сәслеләре менән көс һынашты. 12 ҡатнашыусы араһында төрлө йәштәгеләре һәм төрлө һөнәр эйәләре бар ине.Башҡортостан Республикаһында бала хоҡуҡтары буйынса вәкил Милана Скоробогатова турнирҙа ҡатнашҡан һәр йәш шахматсының күҙҙәрендә ғәм һәм аҡыл булыуын билдәләне.
Рәсәйҙең Дәүләт Думаһы депутаты Зөһрә Рәхмәтуллинаның ҡатнашыуы сараға мәртәбә өҫтәне. Зөһрә Йыһанур ҡыҙы йәш ҡыҙҙар менән шахмат уйнап алырға ла өлгөрҙө.
— Тап ошо спорт төрөнөң көслөләр, аҡыллылар, спорт һөйөүселәр һәм тәрән фекер йөрөтөүселәр өсөн икәнлеге һәр кемгә лә мәғлүм. “Шахматты – мәктәптәргә” проектының бөгөн беренсе аҙым яһауы бик ҡыуаныслы хәл. Был уйын бик мауыҡтырғыс, һәм ул бөгөн балаларға бигерәк тә кәрәк, сөнки интернет селтәренә, гаджеттарға ваҡыт сарыф итеүгә ҡаршы лайыҡлы сара булырға тейеш, – тине ул.
Зөһрә Рәхмәтуллина фекеренсә, шахматҡа ил, республика кимәлендә иғтибар ҙур. Яңы проект балаларҙың зиһенен үҫтереү, уларҙы уйлы-фекерле итеү, ата-әсәләргә, уҡытыусыларға балаларҙы тәрбиәләү өлкәһендә ярҙам итеү маҡсаты менән бойомға ашырыла.
Ошо проекттың ун беренсе этабы булған шахматсы ҡыҙҙар турниры ҡара сәсле һылыуҙарҙың һары сәслеләрҙе 9:3 иҫәбенә еңеүе менән тамамланды. Етди йөҙ менән шахмат таҡтаһында ышаныслы хәрәкәттәр эшләгән ҡыҙҙар ысын мәғәнәһендә һоҡланырға мәжбүр итә. Шахмат уйындарының зиһенде үҫтереп кенә ҡалмай, тормошта ла үҙ-үҙеңә, һәр яһаған аҙымыңдың дөрөҫлөгөнә ышанырға ярҙам итеүенә инанаһың.