Һөнәре буйынса башҡа өлкәне һайлаһа ла, спортҡа һөйөүе көслө булып сыға Олокүл егете Илнур Бикташевтың. Шуға ла 1-се курстан алып спорт менән шөғөлләнә. Ул эколог дипломы алғас, тәүҙә Өфөлә химия заводында эшләй, һуңынан районға ҡайта.


Олокүл мәҙәниәт йортонда мә­ҙәни ойоштороусы булып эшләй башлағас, бында спорт залы, тренажер бүлмәһе асты­рыу­ға ҙур көс һала. Артабан спорт һөйөүселәрҙе Илнур Ҡа­сим улы пауэрлифтинг һәм армспорт төрҙәренә өйрәтә башлай.
– Башҡортостан – алдынғы спортсылар йәшәгән төбәктәрҙең береһе. Районыбыҙҙа ла спортсылар күп. Олокүлдә иһә төрлө йәштәгеләр ихлас шөғөлләнә – балалар ғына түгел, ололар ҙа, ирҙәр менән бер рәттән ҡатын-ҡыҙҙар ҙа. Беҙҙең тәрбиә­ләнеүселәр Башҡортостанда һәм Рәсәйҙә уҙғарылған ярыштарҙа ҡатнаша, призлы урындар яулап шатландыра. Улар араһында физик мөмкинлектәре сикләнгән – терәк-хәрәкәт ағзалары зарар­ланған спортсылар араһында пауэрлифтинг буйынса Рәсәй һәм Башҡортостан чемпионы Марат Хәсәнов, призерҙар Лиана Фәйзуллина һәм Тимур Талиповтарҙың булыуы – беҙҙең өсөн ғорурлыҡ, – тине ул.
Һәр яҡлап әүҙем Илнур Бикташев спортты ғына түгел, музыканы ла бик ярата. Мәҙәниәт йортонда вокал-инструменталь ансамбль дә ойоштора. Уҡыусы­ларҙы гитара, бас-гитара һәм барабан серҙәренә төшөндөрә егет. Йәмәғәтселек тормошонда ла ҡайнап йәшәй ул. 2009 – 2012 йылда райондағы “Йәш гвардия” бүлексәһенә, 2013 йылда “Виктория” сәләмәтләндереү лагерына етәкселек итергә лә өлгөрә тырыш егет.
Физкультура һәм спорт менән шөғөлләнеү маҡсаттарҙы атҡа­рып сығыуға көс бирә, яҡшы кә­йефкә нигеҙ булып тора. Сәләмәт йәшәү рәүешен пропагандалауҙа нәҡ спорт һөйөүсе егеттең өлөшө ҙур.

Ҡырмыҫҡалы районы.