Йорттар ғына түгел, күңелдәр ҙә йылына16.01.2019
Бөгөн ауыл ерендә утын яғып, электр плитәһендә аш-һыу бешереү тарихта ғына ҡала бара. Шөкөр, республика етәкселеге лә был тәңгәлдә байтаҡ эштәр башҡара, төрлө маҡсатлы прог­раммалар сиктәрендә хатта төпкөл ауылдар халҡы ла рәхәтләнеп “зәңгәр яғыулыҡ” менән файҙалана. Хәҙер тәбиғи газ ҡулланмаған ауылдар бармаҡ менән генә һанарлыҡ, социаль объекттар күптән инде газға тоташтырылған.

Иҫке Балтас ауылының “Көнбайыш” биҫтәһендә лә Яңы йыл алдынан газ үткәргес сафҡа индерелеп, йорттар “зәңгәр яғыулыҡ”ҡа тоташтырылды. Ғөмүмән, районды тәбиғи газға күсереү йүнәле­шендә алып барылған “Ауыл биләмәләрен тотороҡло үҫте­реү” маҡсатлы программаһы­ның дауамы был. Объекттың дөйөм хаҡы 21 миллион һум­дан ашыу. “Көнбайыш” биҫтә­һендә бөгөн 600-гә яҡын йорт иҫәпләнә, шуларҙың барыһын да газлы итеү – төп бурыс. Шуныһы ҡыуаныслы: төбәктә халыҡты газ менән тәьмин итеү буйынса эш күләме арта ғына, мәҫәлән, әле йорттарҙың яҡынса 59 проценты “зәңгәр яғыулыҡ”ҡа тоташ­тырылған.

Биҫтәлә йәшәгән Гөлназ һәм Эльвир Саяповтар 2016 йылда яңы йорт һалып ингән. Быға тиклем йәштәр ҡышҡы­лыҡҡа утын хәстәрләп, электр плитә­һендә аш-һыу бешерһә, әле рәхәтләнеп тәбиғи газ менән ҡуллана.

— Шөкөр, ауылда ла уңайлы мөмкин­лектәр асылды, хәҙер утын әҙерләү проблемаһы юҡҡа сыҡты. Иртән торһаң да, кис ҡайтһаң да өйөң йылы, — ти Саяповтар. — Бындай шарттар бүләк иткән етәкселеккә оло рәхмәтлебеҙ. Киләсәктә тәбиғи газ йортобоҙҙо ғына түгел, ә күңел­дәребеҙҙе йылытыр тип өмөтләнәбеҙ.


Вернуться назад