Алда хәбәр иткәнебеҙсә, бөгөн иртәнсәк Бишбүләк районында ҙур фажиғә булды. Урындағы халыҡ әйтеүенсә, барыһына ла “Шевроле Нива” автомобиле водителе ғәйепле.

Ул шыр иҫерек булған. “Күпме кешенең ғүмерен өҙҙө! – тип әсенә урындағылар. – Үҙе иҫән, шәбәйер ҙә мотлаҡ закон буйынса яуап бирер”.
Һәләк булған водитель – Бишбүләктең үҙенән 37 йәшлек Радик исемле ир. Ул вахта ысулы менән Себерҙә эшләгән. Ғаиләһен ҡайтып күреп, киләһе шишәмбелә кире юлға сығырға тейеш булған. Ә пассажир ҡатындар унан бөгөн Миәкәгә алып барыуын һораған.

“Радик машина күптән түгел алды, рулдә бик тәртипле йөрөй торғайны”, – ти ауылдаштары. Ирҙең ҡатыны һәм 11 йәшлек ҡыҙы ҡалған. “Атаһының һәләк булғаны хаҡында балама һаман әйтә алмайым”, – тип күҙ йәшен түгә әсә.

Һәләк булған башҡа пассажирҙарҙың да ғаиләләре булған.