Бөгөн Өфө художество галереяһында “Республиканың тыуыуы”художество күргәҙмәһе асыла. Проект Башҡортостандың 100 йыллығына арнала.
Экспозицияла һынлы сәнғәт, скульптура, графика, биҙәү-ҡулланма сәнғәте әҫәрҙәре тәҡдим ителә. Проектта Өфө, Стәрлетамаҡ, Нефтекама, Межгорье, Ишембай, Бөрө, Мәләүез, Әбйәлил, Ҡырмыҫҡалы, Ейәнсура рәссамдары ҡатнаша.
Ойоштороусылар белдереүенсә, күргәҙмәләге әҫәрҙәрҙең барыһы ла тарихи осор ваҡиғаларын сағылдыра. Рәссамдарҙың күбеһе әҫәрҙәрен тыуған яҡҡа, милли йолаларға, төрлө халыҡтарҙың рухи мираҫына арнаған.
“Республиканың тыуыуы” күргәҙмәһе Башҡортостан рәссамдарының иҫтәлекле датаны байрам итеүгә әҙерлегенең тәүге этабын тәшкил итә. Ҡайһы бер тематик әҫәрҙәрҙе киләһе йыл Рәсәй төбәктәрендә ойоштороласаҡ “Оло Волга ХII” һәм “Урал XII” төбәк-ара һынлы сәнғәт күргәҙмәләренә ҡуйыу күҙаллана. Әлеге күргәҙмә 2018 йылдың 9 февраленә тиклем дауам итә.