“Ялҡау — сәбәбен, булдыҡлы мөмкинлеген таба” тигән халыҡ һүҙҙәре нәҡ эшҡыуар Эльмир Хәбибов тураһындалыр ул. Юғары белемле белгес бынан бер нисә йыл элек район ауыл хужалығы идаралығындағы вазифаһын ҡалдыра ла үҙ эшен асып ебәрә.

Башҡа йүнәлештәрҙә үҙен бер ни тиклем һынағандан һуң йәшелсә үҫтереү тармағын һайлай һәм йылытма (теплица) төҙөү өсөн ҡуртымға ер ала. Беренсе йыл уңыш ул көт­кәнсә булмай: Тәтешле тупрағын ҡыяр ниңәлер бик үҙһенмәй. Уйлаған һәр ниәтен аҙағына еткерергә өй­рәнгән егет эшен Кәлтәү ауылына күсерергә ҡарар итә һәм баштан-аяҡ хәстәрҙәргә сума. Хәҙер ул 17 су­тый ерҙә миҙгеленә 20 тоннанан ашыу юғары сифатлы ҡыяр үҫтерә. Был тәмле һәм һутлы йәшелсә менән, тыуған төйәгенән тыш, күрше Балтас районы һәм Пермь крайының Көйәҙе ҡасабаһы сауҙа нөктәләрен тәьмин итә. Сит-ят тарафтарҙан килтерелгән һәм тәме яғынан бер ҙә маҡтарлыҡ булмағандарға ҡара­ғанда Эльмир үҫтергән ҡыярҙы бар ерҙә теләп алалар.
– Алдағы йылдарҙа йәшелсә ул­тыртыуҙы иртәрәк башларға ниәт­ләйем, – ти Эльмир Радмир улы. – Халыҡтың, бигерәк тә теплицалары булмағандарҙың, үҙ йәшел­сәһе етешкәнсе, уларҙы яңы ғына йы­йылған ҡыяр менән тәьмин итергә тейешбеҙ.
Теплицала йәшелсә үҫтереүселәр Гөлфиә Ҡәнәфина менән Алевтина Вәлинурова тырышып хеҙмәт һала: улар үҫентеләрҙе өҙлөкһөҙ ҡарап тәрбиәләй, өлгөргән ҡыярҙарҙы йыйып, һатыуға әҙерләй.
Эльмир үҙе лә көноҙоно ошонда. Эшҡыуарҙың шулай уҡ помидор үҫ­те­реүгә ныҡлап тотоноу планы ла бар.
Уңған йүнселдең эш йүнәлештәре бөгөн йәшелсәселек менән генә сикләнмәй. Ул малсылыҡҡа ла ҡолас киреп тотонған: урындағы иҫке ферманы рәткә килтереп, ике тиҫтә баштан артығыраҡ һыйырҙан торған көтөү туплаған, тоҡом үгеҙе лә алған. Киләсәктә мал һанын арттырырға ниәтләй.
Эльмир Хәбибовтың тағы 150 гектар һөрөнтө ере бар. Был майҙанда ул тәү сиратта мал аҙығы, шулай уҡ иген куль­туралары үҫтерергә йыйына.
Бер нисә йыл элек яңы эш башлаған фермер, конкурста ҡатна­шып, махсус дәүләт программаһы буйынса бер миллион 400 мең һумлыҡ грант алған.
– Эшләргә теләге булған кешегә Хөкүмәт ярҙам итә, – ти Эльмир Хәбибов. – Ауыр­лыҡ­тарҙан ҡурҡмаҫ­ҡа кәрәк һәм, әлбиттә, бер башлағас, тырыш­лыҡ һалыр кәрәк. Шунда ғына бар пландарың тормошҡа ашасаҡ.
Йәш эшҡыуарҙың матур уй-ниәттәре бихисап. Ныҡыш­малылыҡ һәм маҡсатҡа ынтылыш та етәрлек үҙендә. Шуға ла уның уңыштарға өлгәшәсә­генә шик юҡ.