Ошо көндәрҙә республикабыҙҙың Милли музейында “Башҡортостандың йәшмә бүлмәһе” тип аталған күргәҙмә эшләй башланы. Унда ошо аҫыл таштан юғары зауыҡ кимәлендә яһалған әйбер өлгөләре ҡуйылған. Күргәҙмәнең маҡсаты – халыҡты башҡорт йәшмәһенең күп төҫлө үҙенсәлектәре менән таныштырыу, художестволы кәсептәрен һаҡлап ҡалыу һәм үҫтереү.Уҙған быуаттың 70-се йылдары уртаһындараҡ “Правда” гәзитендә баҫылып сыҡҡан бер мәҡәлә Учалы районы халҡын аптырашта ҡалдырғайны: яҙманың авторы ошо төбәктә йәшәүселәрҙе кескәй генә йылға аша күпер һалғанда гранит ҡулланыуҙа ғәйепләй. Тәбиғәт биргән байлыҡты әрәм-шәрәм итәләр, йәнәһе. Ә бит бында ысынлап та мәғдән аяҡ аҫтында тапала, күпер ҙә һалалар, ферма ла төҙөйҙәр. Әгәр ҙә беҙҙең мунсаның нигеҙе йәшмәнән генә тороуын белһә, был автор ни эшләр ине икән?..
Күргәҙмә экспонаттарын ҡарағанда ирекһеҙҙән ошо ваҡиға иҫкә төштө. Ысынлап та, тәбиғи байлыҡ өҫтөндә йәшәйбеҙ. Йәшмә ятҡылығы ғына ла Башҡортостандың Учалы, Әбйәлил, Баймаҡ һәм Хәйбулла райондары буйлап оҙонлоғо 300 һәм киңлеге 50–60 километр самаһындағы һыҙат булып ята. Ошо ташты эшкәртеп, нимә генә яһамай оҫталар! Әлеге күргәҙмә майҙаны уларҙың ҡайһы бер өлгөләрен генә һыйҙырған.
Әлиә Байрамғолованың эскизы буйынса эшләнгән “Тормош ағасы” панноһы был матур әйберҙәр араһында ҙур ғына урынды алып тора. Ағастың япраҡ менән ҡапланған өҫкө өлөшөн аҡ ҡоштар биләй, улар кешелектең яҡты хыялдарын, ынтылыштарын сағылдыра. Тамырҙар аҫтында йылан баштары саҡ-саҡ ҡына күренә, унда – күҙгә бик салынырға тырышмаған мәкерлек донъяһы. Ағастың бер яғында йәшел сизәм өҫтөндә ҡулына ҡымыҙ һалынған туҫтаҡ тотоп ҡатын ултыра. Йөҙө уйсан һәм донъяның киләсәге өсөн борсолған һымаҡ. Икенсе яҡтағы йәшел үлән өҫтөндә яугир кейемле ир кәүҙәләндерелгән. Ул ҡоралһыҙ, ләкин ҡатындың йөҙөнән күҙен дә алмай – уға хәүеф янай ҡалһа, яҡлауға ташланырға әҙер. Иғтибарлыраҡ ҡараһаң, ике яҡтағы сиҙәм дә – кеше йөҙө икән! Улар ошо ағасты уртаға, йәғни ҡурсауға алған тәбиғәт рухтарын сағылдыра.
Скульптор Арыҫлан Асҡаровтың башҡорт донъяһын образлы кәүҙәләндергән вазаһы, башҡа күп төрлө экспонаттар ҙа аҫылташтарҙан эшләнеүе генә түгел, художестволы кимәле менән дә үҙенә йәлеп итә. Уларҙы тасуирлап ҡына аңлатып булмай, барып күрергә кәрәк. Музейҙың ишектәре дүшәмбенән тыш һәр көн асыҡ.