Һорау-яуап08.05.2015
Гәзит уҡыусыларҙан килгән мөрәжәғәттәргә Аллергология һәм педиатрия клиникаһының баш табибы, медицина фәндәре кандидаты Айритта ХАНОВА яуап бирә.

— Йыл һайын ошо ваҡытта тымау тейгән ише танауымдан һыу ағып, сөскөрөп-быш­ҡырып яфаланам. Тәүҙәрәк һыуыҡ тейгәндән дарыуҙар эсә торғайным, файҙаһы булмағас, туҡтаттым. Таныштарым, бәлки, аллергиялыр, ти. Был ваҡытта ниндәй аллергия булыуы мөмкин?

Камил ШӘРИПОВ.
Миәкә районы.

— Поллиноздан яфалана­һы­ғыҙ­ҙыр, моғайын. Бындай аллергик елһенеү сирен үҫемлектәрҙең һәм ағастарҙың һеркәләре ҡуҙ­ғыта. Һеҙгә иң башта тикшере­нергә, анализдар бирергә, сәбәбен асыҡларға, һуңынан инде тейешле дауаланыу курсы үтергә кәрәк.

— Аллергиянан ҡотолоп булмай, тиҙәр. Шул дөрөҫмө?

Фәүзиә ХӘСӘНОВА.
Ишембай районы.

— Юҡ, дөрөҫ түгел. Йөҙ йылдан ашыу инде был сирҙе шул уҡ аллергендар менән дауалау алымы (үҙенсәлекле аллерген иммуно­тера­пияһы) ҡулланыла. Ул дарыу­ҙар­ға ихтыяжды кәметә. Аллер­ген­дар менән дауалауҙың оҙайлылығы кәмендә 3-5 йыл тәшкил итә. Һөҙөмтәлелеге иһә алынған аллерген күләменә бәйле. Ҡайһы саҡта тәүге курстан һуң хәле яҡшырыуын тойған пациенттар дауалауҙы туҡтата. Бындай осраҡта сирҙең 1-2 йылдан ҡа­бат­ланыуы ихтимал. Башлағас, ярты юлда ташлап ҡуйырға ярамай, тимәксемен. Ғөмүмән, бөгөн аллергология шул тиклем алға китте: яңы, заманса препараттар, диагнос­тика, дауалау алымдары... Улар­ҙың файҙаһы ла, йоғонтоһо ла ҙур.

— “Үҫемлек” аллергияһын булдырмау, ғөмүмән, был сир­ҙән ҡотолоу йәһәтенән ниндәй кәңәштәр бирер инегеҙ?

Сания ХОҘАЙҒОЛОВА.
Сибай ҡалаһы.

— Тәү сиратта бигерәк тә үҫем­лектәр сәскә атҡан, ағастар япраҡ ярған осорҙа урамға мөмкин тиклем сыҡмаҫҡа тырышығыҙ. Ни өсөн тигәндә, һауалағы һеркә кон­центрацияһы был осраҡта — төп аллерген. Хатта тәҙрәләрҙе лә ныҡ­лап ябырға, асҡан осраҡта ла еүеш марля ҡулланырға кәңәш итәм. Автомобилдең быялаһын да төшөрмәү хәйерле. Урамда йөрө­гәндә танауығыҙҙы, ауыҙығыҙҙы ҡаплағыҙ, махсус маска, күҙлек кейегеҙ, өйгә ҡайтыу менән өҫ кейемен алыштырып, душҡа инеп сығығыҙ, ауыҙығыҙҙы, күҙегеҙҙе, танауығыҙҙы сайҡағыҙ.
Был, әл­бит­тә, иҫкәртеү саралары ғына. Симптоматик терапия­ға килгәндә, дарыуҙарҙы мотлаҡ белгестәр тәғәйенләргә тейеш. Ни өсөн ти­гән­дә, аллергияға ҡаршы препараттар бик күп, йүнәлештәре лә төрлө, ә һәр кемде шәхсән тикшереү шарт.


Вернуться назад