ВКП(б) Үҙәк Комитеты партия архивтарын булдырыу кәрәклеге тураһында ҡарар ҡабул иткәс, уны үтәү йөҙөнән ВКП(б)-ның Башҡортостан Өлкә комитеты партия ойошмалары архивын булдыра. Тап ошо ҡарар дәүләт архивы эшмәкәрлегенә нигеҙ һала ла инде. Башҡортостандың күренекле дәүләт эшмәкәре Шәһит Хоҙайбирҙин да бөтә партия ағзаларына революция һәм партия тарихы буйынса материалдар йыйыу кәрәклеге тураһында мөрәжәғәт итә. Архив материалдарының бер өлөшө хәтернамәләр һәм биографиялар бүлегендә һаҡлана һәм тикшеренеүселәр, тарихсылар, шулай уҡ илебеҙҙең, республикабыҙҙың үткәне менән ҡыҙыҡһыныусылар өсөн бик күп мәғлүмәттәргә эйә. Бында тупланған материалдар — республикабыҙҙың милли ҡаҙанышы.
Архив материалдарын туплау барышында айырым фондҡа бүленгән документтар йыйылмаһы барлыҡҡа килгән. Был документтар фәнни-техник яҡтан эшкәртелгән, архивтың яңы методика буйынса белешмә-мәғлүмәт фонды булдырылған. Партия архивының документтары ғилми-тикшеренеү һәм нәшриәт эше өсөн нигеҙ булып тора. Партархив хеҙмәткәрҙәре ҡатнашлығында төрлө йыйынтыҡтар сығарыла.
Бөгөнгө архивсылар, документтар менән эшләүҙең ни тиклем ауыр ҙа, яуаплы ла икәнен белеп һәм өлкән быуын хеҙмәткәрҙәренең милли, мәҙәни мираҫты һаҡлауға индергән өлөшөнөң баһалап бөткөһөҙ булыуын аңлап, уларҙы хөрмәт менән иҫкә ала. Өлкән коллегаларыбыҙҙың эшенә ихтирам, быуындар күсәгилешлелеге — беҙҙең хеҙмәттең тиҫтәләрсә йылдар уңышлы эшләп килеүенең нигеҙ ташы.
Архив документтарына ихтыяж бик ҙур. Республикабыҙҙың дәүләт власы һәм урындағы үҙидара органдары кәрәкле мәғлүмәттәр менән ваҡытында тәьмин ителә. Фән докторҙары һәм кандидаттары, ғилми хеҙмәткәрҙәр, аспиранттар, уҡытыусылар һәм студенттар ретроспектив мәғлүмәтте даими ҡуллана.
Архив документтарын файҙаланыу эше күп яҡлы. Нәҡ уның буйынса дәүләт архивы тураһында ғына түгел, ә республиканың бөтә архив хеҙмәте тураһында фекер йөрөтәләр. Кешеләрҙе ҡабул итеү, дәүләт һәм йәмәғәт ойошмаларының, бигерәк тә ябай граждандарҙың — һуғыш һәм хеҙмәт ветерандарының мөрәжәғәтенә ваҡытында яуап биреү — быларҙың барыһы ла хеҙмәтебеҙҙең кәрәклеге һәм мөһимлеге тураһында һөйләй. Һуңғы йылдарҙа халыҡтың үҙенең шәжәрәһен өйрәнеүгә ҡыҙыҡһыныуы көсәйҙе. Был йәһәттән дә эшебеҙ күп яҡлы.
Беҙҙең архивта ауыл хужалығы өлкәһенә ҡағылышлы материалдар ҙа бихисап. Пенсия реформаһына бәйле граждандарҙың һорау-ғаризалары ла йылдан-йыл арта. Хеҙмәт стажын асыҡлау, льготаға хоҡуҡ биреүсе төрлө дәүләт наградаларын дәлилләү буйынса мөрәжәғәттәр күп.
Архив документтары күргәҙмәләргә ҡуйыла, уларҙы матбуғатта, радио-телевидениела файҙаланалар. Хеҙмәткәрҙәребеҙ республикала уҙғарылған ғилми-ғәмәли конференцияларҙа ихлас ҡатнаша. Беҙ йыл да республикала байрам һәм юбилей көндәре, һөнәри байрамдар һәм юбилей даталары календарын төҙөүҙә ҡатнашабыҙ.
Республиканың гәзит-журналдары редакциялары, профсоюз ойошмалары, сәйәси партиялар һәм хәрәкәттәр бөгөнгө көндә Йәмәғәт берекмәләренең үҙәк архивы фондын тулыландыра. Ветерандар советтары һәм комитеттарының документтарына ла мөһим урын бирелә.
Бөйөк Ватан һуғышы күптәрҙең яҙмышында тәрән эҙ ҡалдырҙы. Бигерәк тә йәш быуындың күңелендә еңеүселәргә ҡарата хөрмәт-ихтирам тәрбиәләү мөһим. Шуға күрә һуғышта ҡатнашыусылар тураһында шәхси мәғлүмәттәр айырым әһәмиәткә эйә. Улар беҙҙә бихисап һәм тарих өсөн үтә мөһим документтар тупланған. Мәҫәлән, фронтовиктың хәрби юлы, һуғыштан һуңғы хеҙмәт йылдары хаҡындағы яҙма хәтирәләре, фронтта, эштә һәм ғаиләһендә төшкән фотоһүрәттәре — шуларға бер дәлил. Архивыбыҙҙа дәүләт һәм йәмәғәт эшмәкәрҙәренең, яҙыусыларҙың, ғалимдарҙың, халыҡ хужалығының төрлө өлкәләрендә эшләүселәрҙең шәхси материалдарынан йыйылған фонд бар. Был юҫыҡта эш артабан да дауам итәсәк.
Таштың да тарихы була, тигән боронғолар. Тарихыбыҙҙы һаҡлап, беҙ, архивсылар, иң тәүҙә киләсәк тураһында хәстәрләйбеҙ.