“Балалар ҡанатлы булып тыуа, ә уҡытыусылар уларҙы осорға өйрәтә”, тигән бер аҡыл эйәһе. Күрәһең, был ҡанатлы һүҙҙәр Миңзилә Муллағолова кеүек белем биреүселәр хаҡында әйтелгәндер. Уңған ханым бына инде егерме йыл Ҡыпсаҡ-Асҡар мәктәбендә ғилем нурҙарын сәсә.

– Мәктәпте тамамлағас, уҡытыусы­лыҡ­ҡа барырға уйлағайным, – ти, хә­тирәләргә бирелеп, Миңзилә Зөфәр ҡы­ҙы. – Тик әсәйем ҡаршы сыҡты: “Етәр, барығыҙға ла уҡытыусы бу­лырға тимә­гән! Ана, бухгалтерға уҡы. Харап йәтеш эш”. Һүҙен йыҡманым, бер аҙ бухгалтер булып та эшләп алдым. Тик был һөнәр ниңәлер күңелгә ятманы. Барыбер уҡытыусылыҡта үҙемде таптым...
Шулай итеп, Зөһрә Арғынбай ҡыҙы менән Зөфәр Ғәлиәхмәт улының ғаилә­һендәге алты баланың бишәүһе педагог һөнәрен һайлай. Бындай күре­нешкә һис тә аптырарлыҡ түгел. “Атайым менән әсәйем әҙәбиәтте, мә­ҙә­ниәтте шул тиклем яратты. Үҙҙәре лә халыҡ ижады хазинаһын һаҡлаған һандыҡ кеүек ине. Үҙ-ара мәҡәлдәр, әйтемдәр менән һөй­ләшерҙәр ине”, – тип хәтерләй Миңзилә ханым.
Бөгөн Миңзилә Зөфәр ҡыҙы мәктәптә Башҡортостан мәҙәниәтен, тормош һа­баҡтарын уҡыта.
– Һәр дәрес уҡыусы өсөн асыш булырға тейеш, — ти ул. – Шуға ла уны мауыҡтырғыс, ҡыҙыҡлы, фәһемле итеп үткәрергә тырышам. Мәҫәлән, төрлө темаға арналған викторина, “Мөғжизәләр яланы” телеуйыны һымаҡ конкурстар уҡыусыларҙы бигерәк тә йәнләндерә.
Ҡыпсаҡ-Асҡар мәктәбе уҡыусылары районда ғына түгел, республикала үткәрелгән ижади бәйгеләрҙә лә көсөн һынап ҡарай. Яңыраҡ ҡына Розалия Солтангәрәева ойошторған сәсәндәр бәйгеһендә уҡыусылары ла, Миңзилә Зөфәр ҡыҙы үҙе лә ихлас ҡатнашҡан. Һөҙөмтәлә уҡытыусы өсөнсө урынды яулаһа, уҡыусылар әйтеш буйынса алдынғылыҡты бирмәгән.
...Йылдар үткән һайын Миңзилә Муллағолованың нәҡ уҡытыусылыҡ һөнәрен һайлағанына ҡыуанысы арта ғына. Тормошта үҙ юлын тапҡан уҡыусыларыңдан рәхмәт һүҙе ишетеүҙән, уларҙың уңыштарын күреүҙән дә оло һөйөнөс бармы?