Башҡортостан Башлығы Рөстәм Хәмитов кисә профессиональ колледж студенттары, уларҙың тренерҙары һәм уҡытыусылары менән осрашты. Атап әйткәндә, WorldSkills һәм “Абилимпикс” (инвалидтар өсөн бәйге) тигән профессиональ оҫталыҡ конкурсы еңеүселәре менән бер өҫтәлдә ултырып һөйләште.

Баштан уҡ Рөстәм Зәки улы егет һәм ҡыҙҙарҙы йөҙгә танып, һәр береһенә исемләп өндәште, тормоштары менән ҡыҙыҡ­һынды, киләсәккә уй-пландарын һорашты.
– Һеҙҙең еңеүегеҙ – республика өсөн оло мәртәбә, – тине республика Башлығы. – Шул һөйөнөслө, беҙҙә бына тигән йәштәр үҫеп килә. Был – уңыш­тарҙың башы ғына, киләсәктә тағы ла бик күп үрҙәр яулары­ғыҙға ышанабыҙ. Ошо конкурс­тар аша үҫмерҙәрҙе эшсе һөнәрҙәргә йәлеп итеү ныҡ отош­ло. Башҡортостан был тәңгәл­дә ваҡытында үҙ урынын би­ләне. Киләсәктә лә хәрәкәткә ярҙам итәсәкбеҙ.
Рөстәм Хәмитов хеҙмәт эшмәкәрлеген Өфө моторҙар төҙөү заводында участка мас­теры булып башлауы, 6-сы разрядлы йыйыусы слесарь эшенә хөрмәт менән ҡарауҙары тураһында бәйән итте. Бел­де­реүенсә, бер осорҙа илебеҙҙә эшсе һөнәрҙәр әҙерләү ныҡ аҡһағайны, училищелар тура­һында хәстәрлек кәмегәйне. Ә бөгөн ҡыҙыҡһыныу, киреһенсә, көсәйҙе, йәмғиәттә эшсе һөнәр­ҙәр кәрәк тигән ышаныс нығын­ды.
WorldSkills һөнәри оҫталыҡ буйынса донъя чемпионатында III урынды алған Сибай күп профилле һөнәрселек колледжы­ның IV курс студенты Рафаэль Яхин, йәш булыуына ҡа­рамаҫ­тан, тренер йөгөн дә тарта, уның уҡыусыһы ла ярышта призлы урынға сыҡҡан.
Солтан Бикәев исемендәге Өфө һөнәрселек колледжы студенты Анастасия Филимонова (“Абилимпикс” конкурсында “Нәшриәт эше” компетенцияһы буйынса еңеү яулаған) һөй­ләүенсә, күңел һөйгән шөғөлгә тотоноу – маҡ­сатҡа өлгәшеү өсөн ярты аҙым.
Ғөмүмән, йәштәрҙең белем эстәп тә, төрлө ярыштарҙа ҡат­на­шып та уңыштарға өлгәшеүе маҡтауға лайыҡ. Шунан сығып, оҫталыҡ – бар һөнәрҙең шартылыр, тип әйтмәй ҡара!


Рафаэль Яхин:
– Уҡырға дуҫымдың кәңә­ше буйынса килдем, еңеүҙәр белем алырға теләкте арттыра. Артабан армияға ба­рырға, юғары белем алырға уйлайым.