Күптәр “Ҡотҡарыу хеҙмәте 112” тигәнде ишетеп кенә беләлер. Ғәмәлдә был муниципаль ҡаҙна учреждениеһы байтаҡ йылдар эшләп килә һәм, телефондан 112 һанын йыйып, “ҡотҡарығыҙ!” ауазы сығыу менән ярҙамға сығып китергә әҙер. Ошо көндәрҙә был хеҙмәттең мәғлүмәт-диспетчер үҙәгендә ғәҙәттән тыш хәлдәрҙе тиҙ арала бөтөрөү сараларына арналған күнекмә үткәрҙеләр.
– Быйыл 2 июлдә булған штаттан тыш хәл – беҙҙең республикала һәм уның тирәһендәге ҡайһы бер төбәктәрҙә миллиондарса кешенең кинәт электр утынан мәхрүм ителеүе ошо өлкәләге белгестәр өсөн ҙур һабаҡ булды, – тине Өфө ҡалаһы ҡала округы хаки­миәте башлығының беренсе урынбаҫары, баш ҡаланың ғәҙәттән тыш хәлдәр комис­сияһы рәйесе, берлектәге күнекмәләрҙең етәксеһе Салауат Хөсәйенов. – Әгәр ҙә ул ҡышҡы һыуыҡтарға тура килһә, эҙемтәләр тағы ла насарыраҡ булыр ине.
Күнекмә Өфөлә электр утының өс сәғәткә һүнеп тороу ихтималлығын тик­шер­ҙе. Был осраҡта ҡала тормошон тәьмин итеп тороусы ойошмалар нимә эшләй аласаҡ? Берҙәм энергетика системаһының Башҡортос­тан төбәк диспетчер идара­лығы директоры Андрей Коротков, “Башҡортостан генерациялау компанияһы” йәмғиәтенең баш инженеры Владимир Кремер, “Өфө­водоканал” предприятие­һының генераль директоры Асҡар Фәйзуллин, айырым предприятиелар вәкилдәре һәм башҡалар ошондай шарттарҙа күреләсәк саралар тураһында ентекле һөйләне. Өфөнөң йылылыҡ селтәрҙәре етәксеһе Максим Петров әйтеүенсә, ҡышҡы селлә булғанда ла ҡаланың был тармағы өс сәғәт буйы йорттарҙы һыуытмай тора аласаҡ. Ә бына Өфө элас­томер материалдар һәм конструкциялар заводы цехтар­ҙағы йылыны ике сәғәттән дә оҙағыраҡ һаҡлай алмая­саҡ.
Күнекмә барышында Өфө ҡала электр селтәр­ҙәре буйынса 11 бригада­ның, 14 берәмек техниканың авария урынына юлланырға әҙер икәнлеге асыҡланды. Ғәҙәттән тыш хәлдәрҙе бөтө­рөү системаһының айырым иғтибар үҙәгендә булған объекттарға (дауаханалар, балалар баҡсалары һ.б.) тиҙ арала күсмә электр станциялары барып етәсәк.
– Авария эҙемтәләрен бөтөрөү – ҡотҡарыу хеҙмәте буйынса белгестәрҙең эше, әммә һәр предприятие етәк­сеһе электрһыҙ тороп ҡал­ған ваҡыт эсендә ниндәй ашығыс саралар күрергә икәнен аныҡ белергә бурыслы, – тине Салауат Хөсәйе­нов.