Тыуған ауылым Бирҙеғол бәләкәй генә, ә үҙе моңға бай, музыка ҡоралдарында уйнаған кешеләре менән дә дан тота. Бигерәк тә оло быуындың – атай-олатайҙарҙың, өләсәй-әсәйҙәрҙең ҡурай, тальян, ҡумыҙ, мандолина, скрипка һәм гармунда уйнағаны хәтеремдә. Белорет яҡтарында тарихсыбыҙ Борис Оглоблин тәҡдиме менән 2014 йылда тәүге гармунсылар конкурсы үткәрелә. Уға тиклем дә районда ла, ауылдарҙа ла гармун дәрәжәле урында торҙо.
Гармунға мөкиббән ауылдашым – “Көньяҡ Урал” дәүләт тәбиғәт ҡурсаулығында инспектор булып эшләгән Мөбәрәк Сәлимгәрәй улы Ғәлиастановты оло ихтирам менән телгә алам. Ул ҡурсаулыҡта 12 йыл намыҫлы эшләй. Бала саҡтан гармун, баян, тальян гармунында уйнарға өйрәнә. Тәүге көйҙө Миңлехан Моратшиндан (хәҙер мәрхүм) отоп ала. Аҙаҡ иһә ауылыбыҙҙың иң оҫта гармунсыһы Ғәлметдин Ҡунаҡбаев уның остазы була. Шулай итеп, ул ныҡлап гармунда уйнарға тотона һәм юҡҡа түгелдер ҙә.
Мөбәрәк өлгөлө урман ҡырҡыусы Сәлимгәрәй Ғәлиастановтың ун ике балалы ғаиләһендә тыуа. Ғаилә башлығы ла оҫта ҡурайсы һәм йыраусы була (ул башҡарған йырҙар яҙмаһы радио фондында ла бар). Ағалары ла гармунда яҡшы уйнаған. Ә Мөбәрәктең репертуарында Ғәли Хәмзин башҡарған йырҙар, халыҡ көйҙәре күп.
Инйәр леспромхозында эшләгән сағында ул “Коммунистик хеҙмәт ударнигы” исеменә лайыҡ була, ә 2016 йылда “Хеҙмәт ветераны” исеме бирелә.
Мөбәрәк ауыл, район, республика, Рәсәй күләмендә үткәрелгән конкурстарҙа әүҙем ҡатнашып, һәр саҡ уңышҡа ирешә, төрлө урындар яулай. Мәҫәлән, 2007 йылда “Инйәр хазиналары” район фестивалендә икенсе дәрәжә дипломға лайыҡ була. Ошо уҡ йылда Межгорье ҡалаһында гармунсылар конкурсында беренсе урынды яулай. 2012 йылда Магнитогорск ҡалаһында А.Г. Заволокина етәкселегендә ойошторолған “Уйна, гармун!” конкурсында лауреат исеме алып, диплом менән бүләкләнә.
2014 йылда I район гармунсылары конкурсында икенсе дәрәжә дипломға лайыҡ була. 2015 йылда Яңауыл ҡалаһында Фәтих Ихсанов исеменә арналған “Моңға бай гармун байрамы”нда беренсе урын бирелә. Былтырғы еңеүе иң мәртәбәлеһелер –“Күп таланттар” республика конкурсында Көньяҡ Урал дәүләт тәбиғәт ҡурсаулығы маҡтау ҡағыҙы менән бүләкләй. Моңло, ғәйрәтле башҡорт халыҡ көйҙәрен уйнағаны өсөн III дәрәжә дипломға лайыҡ була. Быйыл Белорет районының Тирлән ауылында “Йырла, уйна, гармун!” II район гармунсылары конкурсында беренсе урынды яулай. Был ҡаҙаныштар киләсәктә лә дауам итһен, шуға ла: “Артабан да тынма, уйна, Мөбәрәк”, – тип әйтке килә.
Ул үҙе лә йырҙар ижад итә башлаған, биш йыр яҙған, нотаға һалыуҙа Вилмир Әүбәкиров ярҙам итә. “Тыуған ауылыма”, “Үткән ғүмер” йырҙарын үҙе башҡара. Уларҙы профессиональ кимәлгә тиклем еткереү өҫтөндә эш алып бара.
Мөбәрәк бар яҡтан да килгән. Өйҙәре яҡты, бейек, таҙа, тирә-яғы гөл-сәскәләргә күмелеп, күҙҙең яуын алып тора. Ғаиләһе лә өлгөлө, ҡатыны Рәйлә хаҡлы ялда, ейәнсәрен ҡараша. Ике ҡыҙы ла атайҙары кеүек гармунда ла оҫта уйнай. Ейәне Асҡарға бары йәш ярым ғына булһа ла, ул да гармун тотоп маташа.
Ауылда үткән сараларҙа Мөбәрәктең гармун моңона олоһо ла, йәше лә, үҫмере лә йырлап, бейеп күңел аса. Уны йәштәргә үрнәк итеп ҡуйырға була, сөнки башҡорт моңон, көйөн таратыуға ҙур өлөш индерә. Ауылдаштары ла: “Уйна әле, Мөбәрәк!” – тип уға һәр саҡ уңыштар, ҙур ҡаҙаныштар теләп тора.
Тәнзилә ЙОМАДИЛОВА,
хеҙмәт ветераны.
Белорет районы.