Райсовет бинаһынан
Халыҡ шаулашып сыға:
Председатель әйбәтләнгән,
Һәр кем аптырай шуға.
Ҡабул итеү бүлмәһендә
Ҙур сират-фәлән дә юҡ,
Өсәр көн сират көтөүсе
Бер генә әҙәм дә юҡ.
Председатель тәүфиҡләнгән,
Бәндә ғәжәпкә ҡалған.
Әйтәләр:
– Әллә ул инде
Яңы тел һатып алған?
Элек кәңәш һорап килһәң,
Ул бәлә таға ине,
Судын әйтеп, чуртын әйтеп,
Ҡотоңдо ала ине.
Хәҙер бүлмәһенә керһәң,
Яҡты йөҙ, яҡты сырай;
Ул һине ҡосаҡлап алып,
Таҙалыҡ-һаулыҡ һорай.
Ҡарсыҡтарға, әбекәй, ти,
Бабаҡай, ти, ҡарттарға.
Йәштәр килһә, уңғандар, тип,
Эй, тотона маҡтарға.
Председатель яҡшырған, тип,
Һин ғәжәпләнмә, туған,
Яңы һайлауҙар хаҡында
Кисә бит указ булған!

1959 йыл.