Өфө районында үткән әҙәбиәт марафоны Бөйөк Ватан һуғышында Еңеүҙең 70 йыллығын байрам иткән көндәргә тап килеүе менән үҙенсәлекле булды. Сара Николаевка ауылындағы урта мәктәп янында Советтар Союзы Геройы Александр Михайловҡа бюст асыуҙан башланды.


Уҡыусылар, ветерандар, ауыл хал­ҡы, батырҙың ту­ғандары тигеҙ сафҡа теҙелгән. Хатта алыҫ Калининград өлкәһенән батырҙың бер туған һеңлеһе Зоя Семак та килгәйне. Тантанала шулай уҡ мәктәптең IV класс уҡыусылары “Башҡортостан пионер­ҙары” сафына ҡабул ителде. Балалар тыуған ил­де яратырға, Александр Михайлов кеүек ысын кеше булып үҫергә, яҡшы уҡырға һүҙ бирҙе.
Александр Фадеевич 1925 йылда ошо ауыл Советына ҡараған Кручини­но ауылында тыуа. Ете класты та­мам­лағас, Өфө педагогия учи­ли­ще­һында белем ала. 1943 йыл­да 18 йәше лә тулмаған егет Ҡыҙыл Армияға саҡырыла. Ошо йылдың сентяб­рен­дә Украинаның Черкесск районы ти­рә­һендә барған алышта бер үҙе егермеләгән немецты дөмөктөрөп, дошман һөжүмен кире ҡағыуҙа тиң­дәшһеҙ батырлыҡ күр­һә­тә. Ҡыйыу яҡташыбыҙға Советтар Союзы Геро­йы исеме бирелә. Александр Михайлов 1944 йылдың 2 ғинуарында батырҙарса һәләк булып, Житомир өлкәһенең Бердичев районында ерләнә.
“Әҙәби нағыш”ҡа килгәндә, бюст ас­ҡан­дан һуң ауыл китапханаһында Яҙыу­сы­лар союзы идараһы рәйесе Наил Ғә­йет­бай етәкселегендә ижад менән шөғөлләнеүсе­ләрҙең ҡулъяҙма­лары тик­шерелде.
– Бындай саралар бик мөһим, – тип һүҙ баш­ланы Наил Әсҡәт улы. – Уларҙың ижад итеүсегә файҙаһы ҙур. Һәр нәмәгә үҙ ва­ҡы­тын­да баһа, йүнәлеш биреү мөһим. Беҙҙә ши­ғыр, хикәйә яҙыусылар бихисап, әммә сифатты оноторға ярамай. Был йә­һәттән тәж­рибә уртаҡлашыуҙың әһәмиәте баһалап бөткөһөҙ.
Осрашыуҙа Наталья Федорова, Крис­тина Андриянова, Зилә Шафи­ҡова, Светлана Баженеваларҙың шиғырҙарына кү­ре­некле драматург ғәҙел баһа бирҙе, хаталарын аңлатты. Поэзияны төшөнөп уҡырға кәрәк, тигән фекер әйтте.
– Барығыҙ ҙа шиғыр төҙөлөшөн яҡшы беләһегеҙ. Киләсәктә башҡалар­ҙы ҡабат­ла­маҫҡа, үҙегеҙҙең генә метафорала­ры­ғыҙ­ҙы табырға тыры­шығыҙ, – тигән кә­ңә­шен, моғайын, йәштәр хәтеренә һалып ҡуйғандыр.
Авдон урта мәктәбенән IV класс уҡыу­сыһы Артур Исмәғилев хикәйә­ләрен кил­тергәйне. Йәш автор тиҫ­тер­ҙәре тормошона ар­налған “Тик­ше­реүҙе Василий алып барҙы” тигән мажаралы хикәйәне оҫта тел, ышан­ды­рырлыҡ итеп яҙған. Наил Әсҡәт улы уны хуплап:
– Хикәйәң бик отошло, идеяһы бар, уны гәзиткә бирергә кәрәк. Артабан да ошо юҫыҡта дауам ит, – тине.
Ауылдың мәҙәниәт һарайында да­уам иткән тантанала Наил Ғәйетбай, сығыш яһап, залдағыларҙы Әҙәбиәт йылы, Еңеү байрамы менән ҡотланы.
– Әҙәбиәт әүәл-әүәлдән халыҡты тәр­биәләгән төп көс булды. Әҫәр геройҙары ярҙамында илебеҙҙе күтәр­ҙек, дошмандан һаҡлап ҡалдыҡ. Бөйөк Ватан һуғышы йылдарында халҡыбыҙ ҡорал тотоп та, ҡәләм менән дә фашистарға ҡаршы алышты. Килә­сәктә лә йәш быуында әҙәбиәткә һөйөү уятыуҙы төп маҡсат итеп ҡуяйыҡ. Тыуған илебеҙҙе яратайыҡ, һаҡлайыҡ, – тине әҙип.
Йылъяҙма-китапты Кушнаренко ра­йо­ны­ның хакимиәт башлығы урынба­ҫары Рөстәм Шәрәфетдинов Өфө районының хакимиәт башлығы урын­баҫары Люцина Ризуановаға тап­шырҙы.
Әҙәбиәт байрамы Николаевка урта мәк­тәбенең өлкән класс уҡыусыла­ры сәхнәләштергән “Тере хәтер” исемле спектакль менән тамамланды.