Башҡортостан Башлығы вазифаһын ваҡытлыса башҡарыусы Радий Хәбиров ошо көндәрҙә Өфөлә үткәрелгән 29-сы “АгроКомплекс” халыҡ-ара күргәҙмәһендә әйтеүенсә, беҙгә республикала етештерелгән ысын, сәләмәт, тәмле аҙыҡ-түлекте пропагандалау етмәй. Башҡортостан ауыл хужалығы кооперативтары һәм фермерҙар етештергән продукция экспозициялары төбәк етәксеһен таң ҡалдырҙы.

Радий Хәбиров “ВДНХ-Экспо” алдындағы майҙансыҡҡа ҡуйылған ауыл хужалығы техникаһы өлгөләрен ҡарап сыҡты. Уға шулай уҡ Өфөлә етештерелә башлаған һауынсы роботтарҙы күрһәттеләр. Төбәк етәксеһе күргәҙмәлә Австрия һәм Чехия компаниялары вәкилдәре менән аралашты.