“Физикаһыҙ үҫеш юҡ”22.12.2015
“Физикаһыҙ үҫеш юҡ” Иңендәге һөнәри бурысын ҙур теләк менән ихлас башҡарған педагогтар бихисап. Шуларҙың береһе – Рәми Ғарипов исемендәге 1-се башҡорт республика гимназия-интернатының физика уҡытыусыһы Әлиә Шәрәфетдинова.

Ул Мейәс ҡалаһында тыуып үҫкән, Силәбе дәүләт университетында белем алған. Уҡыған йылдарында уҡ тырыш, әүҙем, маҡсатҡа ынтылышлы булыуы менән айырылып торған.
Хәҙер инде Әлиә Даян ҡы­ҙының 1-се гимназия-интернатҡа тәүге тапҡыр аяҡ баҫыуына ла ике тиҫтә йылдан ашыу ваҡыт үткән. Үҙе уҡытҡан предметты төплө бел­гән, балаларға ябай, аңлайышлы төшөн­дөргән сабыр холоҡло, итәғәтле педагогты һәр кем хөрмәт итә. Физиканан имтихан тапшырырға йыйынған сығарылыш класс уҡыусылары йылдан-йыл арта. Әлиә Даян ҡыҙы уларға өҫтәмә дәрестәр бирергә һәр саҡ әҙер.
Уның атаһы “Урал” автомашиналары эшләнгән заводта баш белгес булған, әсәһе – абруйлы технолог. Эшкә бик иртә йөрө­гәндәр. Ғаиләлә иһә – өс бала. Ҡустыһы Марат менән һеңлеһе Вилена тулыһынса Әлиәнең ҡарамағында. Бәлә­кәстәрҙе уятып, йыуындырып, кейендереп, балалар баҡса­һына оҙатыуын, кис әкиәт уҡып йоҡла­тыуын йылмайып хәтергә ала ул хәҙер. Өлкәндәр эштән ҡай­тыуға өй йыйыш­ты­рылған, ашарға әҙер­ләнгән... Яуаплылыҡ, олоно – оло, кесене кесе итә белеү, хәстәрлекле булыу кеүек сифаттар Әлиәнең күңеленә шулай бала саҡтан һалынған.
Әсәһе яғынан олатай-өләсәйе лә ғүмер буйы мәктәптә эшләгән. Яҡты донъянан киткәндәренә байтаҡ ваҡыт уҙыуға ҡарамаҫ­тан, Миәкә районының Әнәс ауылы халҡы әле булһа данлыҡлы уҡытыусылары Зоя апай һәм Зәй­ни ағай Йыһаншин­дарҙы тәрән ихтирам менән иҫкә ала. Әлиә ҡәҙерлеләре биргән һа­баҡтарҙы күңеленә һең­дергән: һәр кем уны талапсан, ғәҙел кеше тип белә.
– Һәләтһеҙ уҡыусы юҡ. Педагог һәр баланың үҙен­сә­леген күрә белергә тейеш, – ти ул. – Кемдер физиканы үҙһенмәһә, тәү сиратта үҙем­де ғәйепле һанайым: уның күңелендә предметҡа ҡа­рата ҡыҙыҡһыныу уята алмағанмын. Тимәк, был уҡыусыға иғтибарҙы артты­рырға бурыслымын. Бө­гөнгө тормошта бит физиканың әһәмиәте айырыуса ҙур. Иҡ­тисади үҫеш уға туранан-тура бәйле.
Туҡтауһыҙ камиллашыу юлында Әлиә Шәрәфет­динова. Махсус әҙәбиәт­тән, гәзит-журналдан, Интернеттан үҙ предметына, мәғри­фәт, педагогика, психология мәсьәлә­ләренә ҡа­ғылышлы яңылыҡтарҙы даими күҙәтеп, өйрәнеп бара. Шуға күрә лә уның дәрестәре көтөп алына.





Вернуться назад