Башҡортостан дәүләт хеҙмәте һәм идара итеү академияһы доценты, педагогия фәндәре кандидаты Ғәлиә Мөхәмәтйәнова, Бөтөн Рәсәй иң яҡшы фәнни китап бәйгеһендә үҙенең “Башҡортостан мәғарифы быуаттар араһында” тип аталған тупланмаһы менән ҡатнашып, лауреат исеменә лайыҡ булды.Бәйге илдең Мәғарифты үҫтереү фонды тарафынан юғары уҡыу йорто уҡытыусылары һәм ғилми-тикшеренеү учреждениелары хеҙмәткәрҙәре араһында ойошторола. Быйылғы еңеүселәрҙе тәбрикләү 7 – 12 сентябрҙә Сочи ҡалаһында фәнни форумда уҙасаҡ.
Республика данын яҡлап сыҡҡан Ғәлиә Мөхтәр ҡыҙының китабында Башҡортостанда быуаттар арауығында мәғариф тармағын үҫтереү юлдарын эҙләү, маҡсатлы уҡытыу программаларын тормошҡа ашырыу, ғалимдарҙың, практиктарҙың эш тәжрибәһе киң яҡтыртыла. Хеҙмәттә иһә архив документтары, киң мәғлүмәт сараларында баҫылған мәҡәләләр, коллегаларының хәтирәләре, авторҙың шәхси тәьҫораттары урын алған.
Ғәлиә Мөхәмәтйәнова 1987 – 1996 йылдарҙа Мәғариф министрлығында бүлек инспекторы, Дәүләт инспекцияһы етәксеһе вазифаларын биләй. 1996 йылда Өфө ҡалаһы хакимиәтенең халыҡ мәғарифы идаралығына етәкселек итә башлай. 1998 – 2004 йылдарҙа Башҡортостандың мәғариф министры була. Ғәлиә Мөхтәр ҡыҙы – Советтар Союзы мәғарифы отличнигы, ил, республика белем биреү өлкәһендәге маҡтаулы, атҡаҙанған хеҙмәткәр, В. Сухомлинский, М. Кәрим исемендәге миҙалдарға лайыҡ шәхес.
Республика Башлығының 2015 йылдың 10 июнендәге Указына ярашлы, Ғәлиә Мөхәмәтйәнова дүртенсе саҡырылыш Башҡортостан Йәмәғәт палатаһы ағзаһы була һәм ундағы Йәмәғәт контроле, экспертизаһы һәм йәмәғәт советтары менән үҙ-ара бәйләнеш буйынса комиссияны етәкләй. Бынан ике йыл элек Башҡортостан Мәғариф министрлығы ҡарамағындағы Йәмәғәт советы рәйесе, мәғариф өлкәһендә күҙәтеү һәм контроль буйынса идаралыҡ советы ағзаһы итеп һайлана. Бынан тыш, Ғәлиә Мөхтәр ҡыҙы байтаҡ ғилми хеҙмәт авторы булараҡ танылған.
Г. МОСТАЕВА әҙерләне.